Azərbaycanlıların 57,1 faizi piylənmədən əziyyət çəkir

15.02.2007 Yazını böyüt :

Amerikanın «Forbes» jurnalı artıq çəkisi olan sakinlərinin sayına görə, dünya ölkələrinin reytinqini dərc edib. Reytinqin hazırlanması zamanı 15 yaşdan yuxarı olan insanların çəkisi nəzərə alınıb.
Xazar Name Azərbaycan 194 ölkə arasında 53-cü yeri tutur – ölkə əhalisinin 57,1 faizinin çəkisi normadan artıqdır.

Keçmiş SSRİ respublikalarından piylənmədən ən çox Belarus əhalisi əziyyət çəkir (66,7 faiz və 22-ci yer). MDB-də ən qədd-qamətli insanlar isə Tacikistan sakinləridir – onların yalnız 37,3 faizinin artıq çəkisi var.

Yer kürəsində ən arıq insanlar isə Eritreyadadır. Bu ölkənin əhalisinin yalnız 4,4 faizi kökdür və reytinq-cədvəldə sonuncu - 194-cü yeri tutur. Axırdan sonrakı yerləri isə Efiopiya (5,6 faiz) və Banqladeş (6,1 faiz) sakinləri tutur.

Piylənmədən ən çox isə Nauru (94,5 faiz), Mikroneziya (91,1 faiz) və Kuk Adalarının (90,9 faiz) sakinləri əziyyət çəkirlər. ABŞ siyahıda 9-cu (74,1 faiz), Rusiya isə 92-ci yeri tutur (49,1 faiz).

Ümumilikdə isə Ümumdünya Səhiyyə Təşkilatının hesablamalarına əsasən, hazırda dünyada 1,6 milyard insan həddən artıq kökdür və bu tendensiya davam edərsə, rəqəm yaxın 10 il ərzində 40 faiz artacaq.

Ekspertlərin fikrincə, dünyada insanların tədricən kökəlməsinə təəccüblənməyə dəyməz. Onlar bunda urbanizasiya və «fast food» (ayaqüstü yeməklər), az fiziki hərəkət və stressli iş kimi Qərb həyat tərzini təqsirləndirirlər.

Piylənmə üzrə Beynəlxalq İşçi Qrupun ictimaiyyətlə əlaqələr direktoru Nevil Riqbi deyir ki, «urbanizasiya ucbatından daha çox insan sıx mühitdə yaşayırlar, şəhərlərdə onlar ənənəvi qida mənbələrindən uzaqlaşırlar və sənaye məhsullarından asılı olurlar. Modernləşmə az əhalisi və ehtiyatları olan ölkələri ixrac edilmiş, bəzən həddən artıq emal olunmuş qidadan asılı edir. Qərb yeməyi hər yeri basır və insanların çoxu bununla bacarmaq üçün genetik baxımdan hazır deyillər».

Köklük və piylənmə ürək-damar, insult, ikinci dərəcəli diabet və başqa xroniki xəstəliklərin inkişafı riskinin əsas faktorlarından biridir. Ümumdünya Səhiyyə Təşkilatının məlumatına əsasən, ürək xəstəliklərindən hər il 17 milyondan çox insan vəfat edir.

BƏZİ ÖLKƏLƏRİN REYTİNQİ

1	Nauru	94.5%
9	Birləşmiş Ştatlar	74.1%
21	Avstraliya	67.4%
22	Belarus	66.8%
28	Böyük BRitaniya	63.8%
29	Səudiyyə Ərəbistanı	63.5%
35	Kanada	61.1%
43	Almaniya	60.1%
52	Avstriya	57.1%
53	Azərbaycan	57.1%
54	Türkiyə	56.8%
74	Ermənistan	53.3%
77	İran	53.2%
79	Litva	53.1%
88	Braziliya	50.5%
92	Rusiya Federasiyası	49.1%
99	Latviya	47.3%
102	Türkmənistan	46.8%
107	Özbəkistan	46.0%
113	Gürcüstan	44.8%
114	Ukrayna	44.8%
122	Estoniya	42.2%
125	Qazaxıstan	41.4%
126	Moldova	41.1%
128	Fransa	40.1%
133	Qırğızıstan	39.2%
137	Tacikistan	37.3%
148	Çin	28.9%
163	Yaponiya	22.6%
176	Hindistan	16.0%
194	Eritreya	4.4%