Nailə Mirməmmədli:«Onlar xatadırlar, mən heç nə demirəm»

Mətbuat səhifələrində Aygün Kazımova ilə küsülü həmkarı Röyanın barışdığı barədə xəbər dolaşır. Day.az internet saytına istinadən verilən məlumatda deyilir ki, Kamran Həsənlinin «Bizim saat» verilişindən sonra bəstəkar cütlüyü  Nailə və Hikmət Mirməmmədlilər hər iki müğənnini barışdırmaq qərarına gəliblər. Bu məqsədlə də onları evlərinə dəvət ediblər. Bəstəkarların sözünü yerə salmayan Aygün və Röya barışıblar, hətta öpüşüb, qucaqlaşıblar da.

Jurnalistin «bəs nə üçün bu xəbər mətbuata çıxmayıb?» sualına H.Mirməmmədlinin cavabı belə olub: «İnsanları daha çox qalmaqal maraqlandırır, barışıq yox».

Bilmirik, nəyə əsasən bəstəkar belə düşünür, amma bu mövzunu dəfələrlə qəzetimizdə işıqlandırdığımız üçün deyə bilərik ki, bizi estrada səhnəsinin iki tanınmış müğənnisinin küsülü olması heç də sevindirmir. Əksinə, əgər xəbər alsaydıq ki, onlar barışıblar, bunu o dəqiqə qəzetimizdə işıqlandırardıq. Təəssüf ki, nə Aygün, nə də Röyanın dilindən barışıq barədə bir kəlmə də olsun, eşitməmişik.

Maraqlıdır, görəsən, onlar niyə bu xəbəri gizlədiblər? Sualımızı öncə Aygün Kazımovaya ünvanladıq. Müğənninin prodüsseri Hicran xanım bu xəbəri ilk dəfə bizdən eşitdiyini dedi: «Heç bir barışıq olmayıb. Ümumiyyətlə, Aygün xanım Mirməmmədlilərin evinə getməyib. Onun Röya ilə görüşü olmayıb ki, barışıq haqda da danışsınlar».

Röyanın prodüsseri Tolik isə Mirməmmədlilərin evində Aygün Kazımova ilə görüşdüklərini etiraf etdi: «Əslində, Nailə xanımgilə gedəndə Aygün Kazımovanın da orada evdə olduğunu bilmirdik. Amma barışıq baş tutmadı. Çünki Aygün dedi ki, Röya ondan üzr istəsin. Təbii ki, Röya da ondan üzr istəmədi. Axı nəyə görə üzr istəməlidir ki? Aygün Kazımova Şövkət Ələkbərovanın vəkilidir bəyəm, onu müdafiə edir? Heç bir barışıq olmayıb».

Çox maraqlıdır. Bəstəkarlar deyir barışıq olub, Aygün deyir, ümumiyyətlə, onların evinə getməyib, Röya isə deyir, barışmayıblar. İndi kimə inanasan? Sualımıza dəqiq cavab almaq üçün hadisənin təşəbbüskarları və şahidləri Mirməmmədlilərlə əlaqə saxladıq. Lakin Nailə xanım sualımızı çox aqressiv qarşıladı. İki müğənninin barışıb-barışmadığının bizə nə dəxli olduğunu soruşdu. Biz də ona bildirdik ki, bu məsələnin bizə yox, ona aidiyyatı var. Çünki barışıq xəbəri ilk dəfə məhz onların dilindən çıxıb. Nailə xanımsa heç nə demək istəmədiyini söylədi: «Onların hər ikisi xatadırlar. Ona görə də mən bu məsələ ilə bağlı bir söz demək istəmirəm. Susmağı üstün tuturam».

P.S. Daha deməyə bir sözümüz qalmadı…

Mənbə: Gündəlik Azərbaycan qəzeti