Çikaqoda yerləşən Dad və Qoxu Tədqiqat Fondunun direktoru nevropatoloq və psixiatr Alan Hirş hesab edir ki, insanların həddən artıq çəki yığması qidanın televizoru seyr edərkən qəbulunun nəticəsidir.
Həkim bildirir ki, proqramın hansı tipə mənsub olmasından da çox şey asılıdır. Belə ki, proqramın əyləncə dərəcəsinin artması ilə qəbul edilən yeməyin çəkisi də çoxalır. Belə qənaətə Hirş 45 könüllü üzərində apardığı eksperimentlərin nəticəsini əldə etdikdən sonra gəlib. Əsas məqsəd televizora baxarkən insanların dad və qoxuya nə dərəcədə həssas olmalarını üzə çıxarmaq, həmçinin qidaya nisbətdə onların davranışını müəyyənləşdirməkdən ibarət idi. Maraqlıdır, televizora baxan şəxslər adi halda qəbul etdiklərindən təqribən 40-45 faiz artıq yeyirlər. Bu isə belə qənaətə gəlməyə əsas verir: yalnız yeməklə məşğul olan şəxs dad və qoxulara, həmçinin orqanizminin tələblərinə daha diqqətli olur. Artıq çəkidən azad olmaq istəyənlərə Hirş süfrə arxasında əyləşərkən dad və qoxulara ciddi fikir verməyi məsləhət görür.



Mənbə: Həftə içi