"Kim istəyər ki, ailəsi dağılsın, görün o məni nə dərəcəyə çatdırdı ki, bu addımı atdım"
Xalq artisti Məleykə Əsədovanın həyat yoldaşından ayrılması ilə bağlı söz-söhbətlər tükənmək bilmir. Aktrisanın ailəsindən boşanması ilə bağlı müxtəlif fikirlər dolaşmaqdadır. Məsələ ilə bağlı Məleykə xanmın özü ilə əlaqə saxladıq. Məleykə Əsədova eşitdiyimiz xəbəri təsdiqlədi və bildirdi ki, həyat yoldaşı ondan boşanmaq istəməsə də, bu addım məhz aktrisanın özü tərəfindən atılıb. Tezliklə məhkəmə yolu ilə ərindən ayrılacağını dilə gətirən aktrisa bildirdi ki, bunun bir neçə səbəbi var: "Mənim ondan ayrılmağımın birinci səbəbi yalan danışmasıdır. Mən ümumiyyətlə, bir insan kimi yalanı bağışlamıram, amma o mənə dəfələrlə yalan söyləyib. Bundan da başqa, biz tamamilə fərqli insanlarıq, fikirlərimiz bir-birinə heç cür uyğun gəlmir, xasiyyətlərimiz tutmur". Aktrisa qeyd etdi ki, yalan deyəndə bunu xəyanət kimi qəbul etməyək, Muradın özü də təsdiqləyir ki, o heç vaxt mənə xəyanət etməyib: "Sadəcə ailədaxili söhbətlər var ki, görürəm o mənə çox yalan söyləyir, bu, bir-iki dəfə olmayıb dəfələrlə baş verib. Ona görə də bu fikrimdə həqiqətən qətiyəm. Kim istəyər ki, ailəsi dağılsın, görün o məni nə dərəcəyə çatdırıb ki, bu addımı atdım və bundan başqa yolu da yoxdur". Həyatında isə heç bir şəxsin olmadığını deyən Məleykə xanım boşanma işləri ilə bağlı başının qarışıq olduğunu bildirdi. O qeyd etdi ki, bütün lazımi sənədlər aidiyyatı orqanlara verilib, yaxın vaxtlarda bu barədə uyğun qərar çıxarılacaq. Hazırda isə həm sənəti, həm də dünyaya gətirdiyi qızı üçün yaşadığını söyləyən Məleykə Əsədova bəlkə də gələcəkdə kimisə sevib ailə quracağını dedi. Hətta artıq indidən ona evlilik təklif edənlər də var. Amma Məleykə xanım bu təkliflərin hələ ki, onu maraqlandırmadığını bildirərək, gəzib-dolaşan artıq söz-söhbətlərə aydınlıq gətirməyə çalışdı.


Mənbə: 3 nöqtə