Müğənni bu barədə deyilənlərə aydınlıq gətirdi.
"Lider" telekanalının "Biz sizə göstərərik" devizi altında bir çox tanınmış sənətçilər veriliş aparır. Bunlardan da biri populyar müğənni Natəvan Həbibinin "Bax belə" şou maqazin verilişidir. Mətbuatda yayılan məlumata görə, müğənni adıçəkilən telekanalda aparıcılıq etdiyi verilişdən uzaqlaşdırılıb. Ona görə də onu ana olmağa hazırlaşan gürcü qızı Manana əvəz edir. Buna səbəb isə Natəvanın işinə məsuliyyətsiz yanaşması olub. Çəkilişlərə vaxtlı-vaxtında gəlməyən Natəvan Həbibi verilişin rəhbərini əməlli-başlı əsəbiləşdirib. Məsələyə aydınlıq gətirmək üçün müğənninin özü ilə əlaqə saxlasaq da, o deyilənləri inkar etdi və bildirdi ki, telekanalla aralarında heç bir narazılıq yaranmayıb, hər şey öz qaydasındadır: "Sadəcə olaraq, "Biz sizə göstərərik" devizi altında reallaşan layihələrin yayım müddəti ya az olur, ya da aparıcı tez-tez dəyişir. Şərtlər əsasında da mənə həvalə olunan vaxta qədər verilişi aparmışam". Bundan başqa, öz işlərinə vaxt ayıra bilməyən müğənni qarşıda onun yaradıcılıqla bağlı işlərinin olduğunu söylədi. Həm klip çəkilişləri, həm də yeni mahnılar yazdırmalı olduğunu deyən Natəvanın sözlərinə görə, aparıcılıqla əlaqədar olaraq öz planlarını həyata keçirə bilmirdi.



Mənbə: Üç nöqtə