Məşhur estrada müğənnisi Alsu paytaxtımıza təşrif buyuracaq. Amma “Zima” mahnısıyla tanınan sənətçinin pərəstişkarlarına onun canlı ifasını dinləmək nəsib olmayacaq. Çünki Alsu burada konsert verməyəcək. Onun Azərbaycana səfərinin məqsədi rəssam Firəngiz Hüseynovanın fərdi sərgisində iştirak etməkdir. Rus müğənnisini tədbirə rəssam özü dəvət edib. Rəssamlar İttifaqından verilən məlumata görə, sözügedən sərgi iyunun 25-dən 28-nə kimi Muzey Mərkəzində keçiriləcək. “Güllərin harmoniyası” adlı sərgidə Firəngiz Hüseynovanın 70-ə yaxın rəsm əsəri nümayiş olunacaq. Qeyd edək ki, Alsunun rəsm sərgisinə dəvət olunması təsadüfi deyil. Belə ki, müğənni uşaqlıqdan rəssamlıq sənətinə böyük həvəs göstərir. Müxtəlif janrlarda tablolar çəkən Alsu hətta konsert libaslarının eskizlərini də özü cızma-qara edir. Onun Londondakı modelyeri Qulyan Steyn də həmin eskizlər üzərində səhnə geyimləri tikir.