"İKİ-ÜÇ MAHNI BƏSTƏLƏYİB ÖZÜNÜ BƏSTƏKAR ADLANDIRANLARA ÇOX ƏSƏBİLƏŞİRƏM"
"İKİ-üç mahnı bəstələyib özünü bəstəkar adlandıranlara çox əsəbiləşirəm. Axı bəstəkar sözünün böyük mənası var. Əgər sən bəstəkarsansa, onda Üzeyir Hacıbəyov və Qara Qarayev kimdir? Düzdür, Ələkbər Tağıyev kimi istisnalar da olur. O, prokuror idi və eyni zamanda da geniş ürəyə sahib olan bir şəxsiyyət idi. Ələkbər Tağıyev nəğməkar bəstəkar hesab olunur. Bugünkü nəğməkar bəstəkarlar isə özünü doğrultmamış ambisiyaları ilə insanı özündən çıxarmağı bacarır". Bu sözləri bəstəkar-müğənni Elza Seyidcahan söylədi. Peşəkar bəstəkar olsa belə, böyük bəstəkarların yanında özünə bəstəkar deməyə çəkinən Elza xanım bunu digərlərinə də məsləhət gördü. Bəstələdiyi mahnıların birmənalı qarşılanmamasına münasibət bildirən Elza xanım özünü orijinal hesab edir: "Mənim yaradıcılığımı dəyərləndirib mahnılarıma görə mənə qibtə edənlər var. Dəfələrlə müraciət edib, ifa etdiyim mahnıları satmağı təklif ediblər. Özü də yüksək qonorara. Lakin qarşıma belə bir şərt qoyublar ki, həmin mahnıları bir daha ifa etməyim. Mən, belə təklifləri qəbul etmirəm. Ümumiyyətlə, mahnılarıma böyük tələbat var".