O, XARİCİ ÖLKƏLƏRDƏ DİNCƏLƏN SƏNƏT ƏHLİNİ SUÇLADI.
"BİLƏCƏRİDƏN o yana çıxa bilməyən sənət əhli həmişə tamaşaçıları müəyyən yollarla aldadır. Onlar yalandan məlumat verirlər ki, guya yayda Antaliyada və digər xarici ölkələrin istirahət mərkəzlərində dincəlirlər".
   Bu barədə əməkdar artist Baloğlan Əşrəfov müğənnilərin yay istirahəti ilə bağlı sualımızı cavablandırarkən söylədi. Öz vətənində dincəlməkdən xüsusi zövq aldığını deyən müğənni Azərbaycanın dilbər guşələrinin çox olduğunu vurğuladı: "Mən Azərbaycanı xarici istirahət mərkəzlərinin heç birinə dəyişmərəm. Nə varsa, hamısı bu cahandadır. Pulunu xərcləyib, özləri üçün şərait quranda Bakı bəzi sənətçilər üçün yaxşı olur, amma dincəlmək söhbətinə gələndə pis olur? Onlar çox da özlərindən razılıq etməsinlər, çünki sənət adamlarını bu xalq, bu torpaq yaşadır".
   Baloğlan Əşrəfov bildirdi ki, dünyanın hər bir ölkəsində dincəlməyə imkanı var. Hətta lazım gəlsə, bu istirahət ona pulsuz da başa gələr. Amma o qeyd etdi ki, ata-ana yurdunu heç Amerikaya da dəyişməz. Odur ki, müğənni dincəlmək üçün məhz doğulduğu məkana - Masallıya gedəcək.